Xəbər verdiyimiz kimi Prezident estrada ifaçılarına “Xalq artisti” fəxri adının verilməsiylə bağlı sərəncam imzalayıb. Sərəncama əsasən Tünzalə Ağayeva, Röya Ayxan və Mir Yusif “Xalq artisti” fəxri adına layiq görülüblər.
Amma bu gün Azərbaycanın fəxri ad ala bilməyən, yaşa dolmuş incəsənət nümayəndəsi var. Moderator.az bu günə kimi fəxri ad ala bilməyən müğənnilərin bir neçəsini təqdim edir. Onlardan biri həmişə gənc müğənniləri tənqid edərək gündəmə gələn Əli Mirəliyevdir. Altmış doqquz yaşlı Ə.Mirəliyev “Dan ulduzu” ansamblının, Səid Rüstəmov adına orkestrin, Dövlət Mahnı Rəqs Ansamblının solisti olub. O, Gülağa Məmmədov, Şövkət Ələkbərova Sara Qədimova, Rübabə Muradova, Rəşid Behbudov və Müslüm Moqamayev kimi sənətkarlarla çıxış edib. Lakin Ə.Mirəliyev bu günə kimi heç bir fəxri adla təltif olunmayıb. Özünün sakit təbiətiylə seçilən müğənni Nadir Bayramlı da fəxri ad məsələsində bəxti gətirməyənlər sırasındadır. Çoxlu sayda diplom və fəxri fərmanlarla, “Qızıl ulduz” mükafatı ilə təltif olunan əlli altı yaşlı müğənni hələ də dövlət tərəfindən fəxri ad ala bilməyib.
Son zamanlar vətənpərvərlik mahnılarıyla çıxış edən müğənni Səyyad Əlizadə də bu siyahıya daxildir. Altmış bir yaşlı müğənni fəxri ad almamasına görə dəfələrlə Mədəniyyət Nazirliyini qınayıb. Müğəninin 2011-ci ildə fəxri adla bağlı Mədəniyyət Nazirliyinə ünvanladığı məktubuna isə bu günə kimi heç bir cavab verilməyib.
“Qarabağ şikəstəsi”nə möhürünü vurmuş müğənni Tacir Şahmalıoğlu da fəxri ad almaqdan kənarda qalıb. Müğənni bir müddət öncə saytımıza müsahibəsi zamanı dövlətini sevdiyini və ondan fəxri ad gözlədiyini bildirib: “Dünya tarixinə düşən yeganə insanam ki, Olimpiya oyunları, xalq ulduzu, muğam müsabiqəsi, xalqımızın bir çox qəmgin günləri, xoş günləri mənim səsimlə başlayır. Haqq etmədim ki?”
Hələ ötən il fəxri ad almamasına görə gileylənən müğənni Nadir Qafarzadə dünən sosial media hesabında Tünzalə Ağayeva, Mir Yusif və Röyanın Xalq artisti fəxri adı almasına bu cür reaksiya verib. İfaçı videoda ad çəkmədən “Hər şey yaxşıdır. Neyləmək olar ki? Həyatdır, əslində, belə də olmalıdır. Görünür tale, qismət belə imiş. Bəs, bilmirdiniz? Həmişə belə olur. Canınız sağ olsun, əsas odur. Heç narahat olmayın” deyə ünvansız sözlər işlədib. Lakin iyirmi dəqiqə sonra həmin videonu silib.
