<p> </p>
<p>Milli təbiət parkları və qoruqlarında vəhşi atların sayının artması Türkiyədə ekoturizmin inkişafına mühüm töhfə verir.</p>
<p>AZƏRTAC-ın müxbiri Anadolunun Dənizli və Afyonkarahisar vilayətlərinin kəsişməsində yerləşən təbiət parklarından birində olub. Burada digərləri ilə yanaşı, çöl atları da dövlət himayəsindədir.</p>
<p>Akdağ Milli Təbiət Parkı bəzi yerlərdə kanyonlarla kəsişən dağlıq meşəlik ərazidə yerləşir. Dövlət mühafizəsi heyvanları vəhşi təbiətə mümkün qədər yaxın şəraitlə təmin etməyə imkan verir.</p>
<p>Parkda çalışanlar bildiriblər ki, bəzi illərdə Anadolunun bu hissəsində vəhşi çöl atlarının sayı 2 minə çatsa da, soyuq havaların başlaması və xəstəlik səbəbindən onların populyasiyası qeyri-sabitdir. “Yırtıcı heyvanların olması, eləcə də şiddətli şaxtalar atlara mənfi təsir göstərir. Qışda onların qidalanması çətin olur, ona görə də qoruğun müxtəlif nöqtələrində yem qoyur, bu heyvanlara kömək etməyə çalışırıq”, -deyə onlar qeyd ediblər.</p>
<p>Park işçilərinin sözlərinə görə, bu heyvanlar olduqca ürkəkdir və insanları görəndə çox vaxt ağacların arasında gizlənirlər.</p>
<p>Hər il Türkiyənin minlərlə sakini və qonaqları, o cümlədən fotoqrafiya həvəskarları təmiz havada dincəlmək və yüzlərlə atı heyranlıqla seyr etmək üçün Akdağ Milli Təbiət Parkına gəlirlər.</p>
<p>Bu gün Türkiyədə vəhşi çöl atlarına Türkiyənin digər bölgələrində, o cümlədən Çanaqqala, Karaman və Kayseri vilayətlərində rast gəlmək olar.</p>
