“Vətəndaş A” çoxseriyalı filminin ssenarisi Cəfər Cabbarlının “Almaz” pyesinin motivləri əsasında yazılıb. Necə ki 1930-cu ildə şəhərdən ucqar kəndə gəlmiş bir müəllimə yalnız dərs demir, cahilliklə də mübarizə aparır, bugünkü serialın qəhrəmanı “Almaz” da kənd həyatında bütün təzyiqlərə baxmayaraq, mühafizəkarlıqla döyüşür. Yeri gəlir, döyülür, təhqirlərə məruz qalır, lakin öz əqidəsindən bir an belə geri dönmür. Bu düşüncə tərzini dəyişmək üçün, necə deyərlər, özünü fəda edir.
