Müsəlman və xristianlar üzdəniraq “Hellouin” münasibətilə “Şeytan gecəsi” keçirilməsinə üsyan etdi…

0
3

Tatarıstan Respublikasının dindarları – müsəlmanlar və xristianlar paytaxt Qazandakı barlardan birinin qondarma “Hellouin bayramı” münasibəti ilə “Şeytan gecəsi” keçirmək planına qəti və kəskin şəkildə mənfi reaksiya göstərib.

Moderator.az rusdilli İslam saytlarına istinadla xəbər verir ki, bu barədə “Veçerniy Kazan” (“Axşam Qazanı”) nəşri məlumat yayıb.

Təxribatçı tədbirin Tatarıstanın əsas ibadətgahlarının: “Qazan Kremlinin”(dini və tarixi abidələr kompleksi) Kul Şərif məscidi, İrek məscidi, Boqoyavlenski katedral kilsəsi və yeni tikilən digər kilsə yaxınlığında yerləşən “Snob” barında keçirilməsi planlaşdırılır. Daha cəlbedici görünməsi üçün müəssisə sahibləri 2 noyabr axşamında nəzərdə tutulmuş “Şeytan gecəsi»nin afişalarına “çarmıxa çəkilənlər”, “ruhlarını satanlar”, “böyük dələduzun gecəsi” ifadələri yazaraq şeytan obrazı həkk ediblər. Sosial şəbəkələrdə istifadəçilərin qəzəb dalğasından sonra barın sahibləri İblis simvolu olan buynuzlu qara pişiyin göründüyü afişanı dəyişdiriblər. Və guya tədbirin rus yazıçısı Mixail Bulqakovun “Ustad və Marqarita” romanından ilham aldığı bildirilib.

Bundan əlavə, “Snob” rəhbərliyi daha həyasızlıq edərək tədbirin tənqidçilərinin onları dindarlarla üzbəüz qoymağa cəhd etməsindən narazılığını bildirib.

Rus Pravoslav Kilsəsi “Şeytan gecəsi» kimi bir biabırçı tədbirin keçirilmək cəhdini kəskin qınayıb. Qazan yeparxiyasının katibi, protoierey, keşiş Vladimir Samoylenkonun qeyd etdiyi kimi, kilsə həm bu hadisəni, həm də ümumiyyətlə, Rusiyada “Hellouin” kimi qondarma “bayram”ın qeyd edilməsini son dərəcə mənfi qəbul edir.

Qazan və Tatarıstanın mitropoliti, keşiş Feofan “Şeytan gecəsi” nin insanların dini hisslərini təhqir etdiyini vurğulayaraq hakimiyyətdən tədbirin qadağan olunmasını tələb edib.

Eynilə Tatarısatn Respublikası Müsəlmanlarının Ruhani İdarəsindən də sərt reaksiya gəlib. İdarə sədrinin birinci müavini Rüstəm Vəliullin vurğulayıb ki, Tatarıstan dünyəvi bir respublika olsa da, bu, heç bir şəkildə dinə qarşı olmaq demək deyil. Müsəlman ruhani bildirib ki, gözlənilən “Şeytan gecəsi” kimi anti-insani tədbirlər ümumbəşəri ideallara xələl gətirir və gənclərdə öz milli adət-ənənələrinə hörmətsizliyin formalaşmasına dəstək verir.

Sultan Laçın

BİR CAVAB BURAXIN

ŞƏRHİNİZİ DAXİL EDİN!
BURAYA ADINIZI DAXİL EDİN