Xəbər verdiyimiz kimi, ölkə başçısının sərəncamıyla Baş Nazirin müavinləri Əli Həsənov və Hacıbala Abutalıbov işdən azad edilib. Bu sərəncamla da son iki ildə Baş Nazirin Abid Şərifov da daxil olmaqla üç qocaman müavini təqaüdə göndərildi.
Amma hər üç şəxs medianın yaddaşında maraqlı hadisələrlə qaldı. Moderator.az həmin məqamları təqdim edir.
Yetmiş səkkiz yaşında vəzifəsindən azad edilən Abid Şərifov 2015-ci il mayın 19-da paytaxtın Binəqədi rayonu ərazisində çoxmərtəbəli yaşayış binasında baş verən yanğın zamanı daha çox gündəmə gəlmişdi. Yanğında15 nəfər öldü, 50 nəfər isə xəsarət aldı.
A.Şərifovun isə jurnalistlərlə kobud dialoqu ölkə mediasında gündəm olmuşdu. Jurnalistin “Tikinti işlərini hansı şirkət aparacaq?” sualına A.Şərifov belə cavab vermişdi:
“Nə dəxli var sənə?! Nə üçün bilməlisən ki?! Alabala… Sonra?! Müəyyən olunur ki, filankəsdi, filankəsdi də. Bunu biz müəyyən edirik, bunun “pressa”ya nə dəxli var? Sonra sualınız var?!”.
2001-ci ildən Bakı Şəhər İcra başçısı təyin olunan Hacıbala Abutalıbovsa 2018-ci ildə vəzifəsindən azad edilərək Baş Nazirin müavini təyin edilmişdi. Nəhayət ki, dünən o, 75 yaşında nazir müavini vəzifəsindən də azad edildi. H.Abutalıbov isə zaman-zaman verdiyi əcaib açıqlamarında həmişə gülüş hədəfi olub.
H.Abutalıbov narazılıq edən sürücülərlə görüşü zamanı problemi həll olunan sürücülərdən biri “Hacıbala müəllim, bir bu kişi və bir də siz sağ olun” deməsinə Abutalıbovun “Azərbaycanda bir dənə kişi var, o, da bizim prezidentimizdi” cavabı mediada gündəm olmuşdu.
1998-ci ildən Qaçqınların və Məcburi Köçkünlərin İşləri üzrə Dövlət Komitəsinin sədri vəzifəsində çalışan Əli Həsənov cəmisi 1 il öncə təyin olunduğu Baş Nazirin müavini vəzifəsindən dünən yetmiş bir yaşında təqaüdə göndərildi. Ə.Həsənovu mediada rüsvay edən isə nəvəsi Nail Allahverdiyevin paytaxtda idarə etdiyi “Mersedes-Galendawagen” markalı avtomobili ağır yol qəzası törətməsi oldu. Qəza nəticəsində iki nəfər öldü, bir türk ailəsinin iki üzvü isə müxtəlif bədən xəsarətləri aldı. N.Allahverdiyevin bahalı avtomobil kolleksiyası ölkə vətəndaşlarının haqlı narazılığına səbəb oldu. Bununla yanaşı, Türkiyə mediası da bu haqda süjetlər yayımladı. Çoxları həmin vaxt Ə.Həsənovun nəvəsinin “qurbanı” olacağını desə də, bu baş vermədi və yalnız dünən o, vəzifəsindən azad edildi.
